Naturaren Ahotsa
Schreiber Muskerra
Latinez:Lacerta schreiberi
Gaztelaniaz: El lagarto verdinegro
Ingelesez: Schreiber’s Green Lizard
Frantsesez: Lézard de Schreiber
Ezaugarriak
Musker hauek 30 zentimetro baino gutxiago dute (horietatik 11 edo 12
gorputzarenak, muturretik kloakara); buru motza eta gorputz-adarrak
oso indartsuak ditu. Arrak nagusiki berdeak dira, orban beltz txiki
batzuekin, bizkarraldean handiagoak alboetan baino. Emeak, berriz, gehiago
aldatzen dira: oro har kolore arreska dute, berde pixka batekin bizkarraldean.
Hauek ere ozeloak dituzte alboetan eta bizkarraldean, askotan lerro
irregular beltz eta handiekin markatuta. Sabelaldea horia da, orbain
beltz usuekin, eta zortzi ezkata sail dauzkate. Bizkarraldeko ezkatak
handi samarrak dira, eta gila txiki bat dute
Biologia
Helduak oso lurraldekoiak dira, eta beren lur zatia defendatzen dute
espezieko edozein indibiduoren inbasioaren aurka. Araldian emeak onartzen
dituzte; hori udaberrian gertatzen da. Garai horretan arren arteko gatazkak
izaten dira emeak lortu eta gero estaltzeko. Ugalketan zehar, arrak
eta eme batzuek kolore urdin bizia erakusten dute buruaren bi aldeetan
eta zintzurrean.
Ekainaren hasieran, emeek 13 eta 20 arrautza bitartean lurperatzen dituzte,
beraiek lurrean edo zuhaitz enbor erorien azpian egindako zuloetan.
Arrautza horiek iraila aldean irekitzen dira, eta jaio berriak ehizarako
lurralde bat bilatzen hasten dira eta intsektuez elikatzen dira. Haien
kolorea arre berdekara da, sabelaldean orbain zuri eta beltzez inguratuta;
sabela eta buztana horiak izaten dituzte. Hilabete eta erdi eskas dutenean,
urriaren bukaeran, hibernatzera erretiratzen dira, eta ez dira esnatuko
martxoaren erdialde edo bukaerara arte.
Elikadura
Bere talai handientsuan zutik, inguruetako berdean ederki mimetizaturik,
Schreiber muskerra zorigaiztoko intsekturen bat etortzeko zain egoten
da, berehalako hozkada batez harrapatzeko. Saurio honek, eguneko jarduera
izaten du eta abilezia berezia dauka zuhaitz eta sasietara igotzeko;
haietan, armiarmak eta intsektuak ehizatuko ditu. Askotan, halaber,
fruitu azukredunak ere jaten ditu. Landareen artean sasi ezkutaturik
luzaro egoteko ohitura ere badu.
NATURAREN AHOTSA aldizkaritik hartuta.
Gehiago irakurtzeko sakatu hemen.