Naturaren Ahotsa
Hontz Zuria
Latinez:Tyto alba
Gaztelaniaz: Lechuza común
Ingelesez: Barn Owl
Frantsesez: L’effraie des clochers
Deskribapena
Harrapari gautar honek azpialdetik kolore zuri bereizgarria agertzen
du. Bizkarraldea eta hegoen gainaldea urre-kolorekoak dira, grisez eta
beltzek zipriztinduta. Bularrean, tonu eta orban ilunagoak edo marroiagoak
aurkez ditzake. Aurpegiko disko deigarria marroi argia da, eta hau inguratzen
duten luma labur eta arre horixkek bihotz-tankera ematen diote. Egitura
berezi honek, harrapakinek sortutako soinuak entzunbidera zuzentzen
ditu, eta entzumena askoz eraginkorrago bihurtzen du. Begi beltzak ditu.
Tamaina
Luzera: 35-39cm.
Hego-luzera.90-95 cm.
Pisua: 300-360 g.
Biologia
Espezie sedentario hau ganbara eta teilatuetan bizi denez, sortzen dituen
zaratak zenbait izualdi ekarri ditu. Honen ondorioz bere inguruan istorio
ugari asmatu da: adur txarreko txoria dela, elizatako oiloa lapurtzen
duela… Ospe txar hori dela eta, oraindik ere, ale asko hiltzen da, nahiz
eta nekazaritzarako lagungarria izan. Izan ere, saguz, arratoiz, lur-saguz,
eta bestelako ornogabez, narrastiz, anfibioz, hegaztiz eta intsektu
handiz elikatzen da. Hegazti honek, gaueroko ehizaren ondoren botatzen
dituen egagropilak zabalduz, animalia hauen hezurrak erraz ikusiko ditugu.
Teilatu-hegaletan, zuhaitzetako zuloetan edo bestelako hutsuneetan,
bere egagropilen gainean, 4-7 arrautza erruten ditu. Arrautza-kopurua
momentu horretan dagoen elikagai-eskuragarritasunaren araberakoa da.
32-34 egunetan zehar luzatzen den inkubazioaren ondoren txitak jaiotzen
dira; hauek 60-64 egun emango dituzte habian, eta ondoren beste bi edo
hiru aste gurasoengandik hurbil hegan egiten. Momentu horretan beraien
lurraldearen bila abiatuko dira. Urte osoan zehar ugal daiteke, baina
gehienetan, lehenengo txitaldia otsaila edo martxoa aldera izaten da,
eta bigarrena udan.
Elikadura
Gure latitudeetan Hontz Zuriaren elikagai nagusia ugaztun txikiak izaten
dira (harrapakinen 70-100), eta haien artean bereziki aipagarriak dira
basa-saguak eta satitsuak. Gutxiago bada ere, kakalardoak, kilkerrak
eta tamaina txikiko hegaztiak ere harrapatzen dituzte.
Habitata
Animalia hau, jatorriz, gehienbat haitzetakoa zen, eta harkaiztegi,
labar eta kobazulo txikietan bizi zen; gaur egun, ordea, gizakiaren
bizigiroak kolonizatu ditu, oro har. Izatez, gure lurraldean, hegazti
eder hauetariko gehienek herrietako eraikuntzetan egiten du habia, direla
bihitegiak, bertan behera utzitako etxe zaharkinak, hilerriak edo baselizetako
kanpandorreak, eta batzuetan saguzarrak bizikide dituela. Alabaina,
ez da arraroa harkaiztegietan eta harrobietan bizi diren hegaztiak aurkitzea.
NATURAREN AHOTSA aldizkaritik hartuta.
Gehiago irakurtzeko sakatu hemen.