Naturaren Ahotsa
Uroilanda Handia
Latinez: Rallus aquaticus
Gaztelaniaz: Rascón común
Ingelesez: Water Rail
Frantsesez: Le râle d’eau
Deskribapena
Tamaina ertaineko hegaztia; hanka luze eta indartsuak eta buztan labur
eta tentea ditu. Atzealde arrea izaten du zirrinta beltzekin; aurpegia
eta bularra grisaxkak, alboetan marra zuriak eta beltzak izaten dituzte
eta buztanaren behealdea arre horixka kolorekoa. Erraz bereizten da
gainerako uroilandetatik, tamaina handiagoa eta moko gorria baititu.
Oso ohitura zogiak izaten ditu, baina haren presentziaz erraz jabetzen
gara ahots indartsuagatik, egunsentian igortzen duen garrasi, hasperen
eta purrustada sortagatik, alegia.
Tamaina
Luzera: 23-28 cm.
Pisua
90-150 g.
Biologia
Habiagile oso urria da Euskal Herrian; hezeguneak gero eta lehorrago
bihurtzeak dakarrena da gure geografia-aldean espezie hau desagertzekotan
izatea. Gernikako itsasadarrean habia egiten duen espezie ugaria da.
Martxoan hasten dira eztei-arrandiak, eta apirilean, jadanik, beha daitezke
errunaldian habia ezkutuetan, padura eta ibaietako ur bazterretan. Emeak
6-11 arrautza erruten ditu, eta hurrengo 19-21 egunetan zehar inkubatu
ondoren txitak jaioko dira. Kumeek oraindik ere beste 21 egun eman beharko
dituzte habian.
Elikadura
Intsektu eta zizareez elikatzen da nagusiki, baina haziak eta fruituak
ere jaten ditu. Zenbaitetan, arrain txikiak eta saguak harrapatzen ditu
eta arrautzez ere elikatzen da noizean behin.
Habitata
Lakuetako landarediaz (lezkak, ihiak…) inguraturik dauden eta sakonera
txikiko eremuak dituzten hezeguneetan bizi da. Euskal Herrian dagoen
Uroilanda Handiaren populazioa 200 bikotetatik beherakoa dela dirudi.
Hori dela eta, espezie bakantzat hartu du arriskuan dauden espezieen
Euskadiko Zerrendak.
NATURAREN AHOTSA aldizkaritik hartuta.
Gehiago irakurtzeko sakatu hemen.