Naturaren Ahotsa
Alfacara tximeleta
Latinez: Colias alfacariensis
Gaztelaniaz: Colias de Berger
Ingelesez: The Berger’s Clouded Yellow
Frantsesez: : Le Fluoré
Nola ezagutu?
Alfacara tximeletak dimorfismo sexual arina du. Arren kasuan, aurreko
hegoen goiko aldea
limoi kolorekoa da eta disko osteko orban beltza du, baita zenbait tantotxo
apikal ilun ere. Horiek hegoen zona marjinaletik hedatzen dira. Bestalde,
arren kasuan beheko hegoen goiko aldeak disko–orban horia du. Batzuetan
biribila da; beste batzuetan, berriz, zortziaren itxura du eta bestetan
ertz marjinal ilun fina ageri zaio.
Emeak arrak baino handiagoak dira eta hegoen goiko aldea zuri berdexka
da. Orban ilunak arren kasuan baino hedatuagoak daude. Hegoen beheko
aldea, berriz, berdea da. Arrena, horixka.
Tamaina
Aurreko hegoek 19–25 milimetro bitartean neurtzen dituzte eta hego–luzera
38 eta 50 mm bitartean aldatzen da.
Biologia
Tximeleta honek bi belaunaldi ditu urtean. Lehenengo belaunaldiko helduak
hegan ikus daitezke maiatza eta ekainean; bien bitartean, bigarrenekoek
uztailetik irailera bitartean egiten dute. Emeak banan–banan jartzen
ditu arrautzak landareetako hostoen gainean. Ondoren, beldarrak hosto
horiek elikatzeko erabiliko ditu. Beldarrek puntu beltz txikiak dituzte.
Negua lehenengo fasean igarotzen dute eta udaberria iritsi arte ez diote
berriz ere elikatzeari ekingo. Orduan, krisalida eratzen dute elikadura–landareetako
hostoetan eta zurtoinetan.
Elikadura
Beldarrek ferrak (Hippocrepis comosa) eta alamina (Coronilla minima)
jaten dituzte.
Habitata
Espezie migratzailea da eta lursail ireki lehorretan, behe–mendiko zelaietan
eta abariztietan
bizi da, behe–mailetatik 2.500 metroraino.
Banaketa
Europa hegoaldean eta erdialdean bizi da eta Errusiaren hegoalderaino
eta Asia Txikiraino iristen da. Iberiar penintsulan oso zabalduta dago,
nahiz eta populazioak oso ugariak ez izan. Euskal Herrian espezie arrunta
da, bereziki Araban. Dena den, lurralde guztietan aurki daiteke.
NATURAREN AHOTSA aldizkaritik hartuta.
Gehiago irakurtzeko sakatu hemen.